'A primma festa 'e Pasca
E' 'a primma festa 'e Pasca: na iurnata
senza nu sciato 'e viento e chiena 'e sole!
Se sente attuorno n'aria prufumata...
Cantano ll'aucelluzze 'int' 'e ccaiole!
Oie giuvuno', scegliteve na nenna,
ch'ogge 'sta smania ve se legge 'nfronte;
ogge se va 'ncampagna a fa' marenna...
mappate e mappatelle so' già pronte!
M'arricordo pur'i'. Me pare aiere:
saglievemo pe' ccierti stratulelle
strette 'e campagna, mmiez'a ddoie filere
'e bancarelle, carreche 'e nucelle
e castagne d' 'o prevete! P' 'a via
se ncuntravano già, sbullute 'e sole,
gente ca riturnava, c'allegria
pe' dint'all'uocchie: giuvene e figliole!
Saglievemo, saglievemo cantanno
fino a ncopp' 'a muntagna: llà ce steva
pronta na vranca 'e tavulelle - ogni anno
'e stesse! - e 'o bbene 'e Dio ce se vedeva:
casatielle c' 'o ppepe, sfugliatelle,
taralle,vino, ciento belli ccose:
e sempe 'nfrisco cierti mummarelle
d'acqua surfegna aunite cu 'e gassose!
Na bella chiesella campagnola
te nmitava a trasì: c' 'a Madunnella,
ca n'anno sano steva sola sola,
gente aspettava pe' 'sta festa bella!
Ch'armunia se spanneva int' 'a campagna
pe' chillu suono 'e ll'organo, p' e vvoce
ca saglievano a coro p' 'a muntagna!
Che rarità! Che tenerezza doce!
E fore 'a chiesa, tutte sparpagliate
p' 'a scesa d' 'a muntagna, quanta gente
sott'a nu pede d'albero assetate
facevano marenna alleramente!
Quanta gente! Vrancate 'e pecurelle
senza pasture, libbere, cuntente!
Criature 'n libertà, ca palummelle
parevano, currenno mmieze' 'a gente!
E palummella me parive tu,
nnammuratella peccerella mia!
'A tanno, 'a tanno nun te veco cchiù,
e n'aggio fatto vote 'a stessa via!
Na Pasca va, na Pasca vene, e ogne anno
i' m'arricordo 'e te! ma pe' stu core
ogne festa è na pena, è nu malanno,
è na puntella d'anema ca more!
Torna na vota sola, bella mia,
comm'a tant'anne fa! Torna addu me,
ch'aspeto sempe! Che malincunia!
Che'nfamità 'sta luntananza 'a te!
Torna na vota sola! Ogge 'ncampagna
aunimmece a 'sta bella giuventù!
E' a festa d' 'a Madonna d' 'a muntagna,
è Pasca! Torna, e nun lassarme cchiù!
Clemente Parrilli
(da Cento di questi giorni!...Calendario napoletano di prose,poesie e folklore -di Antonio Altamura- Ed.SEN- 1976)
Nessun commento:
Posta un commento